Ambasadori amerikan përshëndeti operacionin “Forca e Ligjit” e prezantuar nga Ministria e Brendshme dhe për herë të parë vendosi afate se kur pret rezultate nga ky operacion.

“Të flasim me vepra dhe jo me fjalë. Presim që ky plan agresiv i Qeverisë së Shqipërisë të përfundojë me arrestimin dhe ndjekjen penale të disa peshqve të mëdhenj në fillim të vitit të ardhshëm dhe ky sukses të vazhdojë me SPAK-un”, deklaroi ambasadori Donald Lu.

Kjo është ajo që presin partnerët ndërkombëtarë, tha Lu, e po ashtu edhe qytetarët shqiptarë. Lu vlerësoi planin.

“Dielli duket që në mëngjes. Na pëlqen që ky plan veprimi e pranon qartë se krimi i organizuar shqiptar është problem serioz dhe kërcënim për sigurinë kombëtare. Pranon gjithashtu se deri më tani organet e drejtësisë penale kanë dështuar ndaj grupeve kriminale”, vijoi ai.

Ndërkohë, ministri Fatmir Xhafaj tha se plani dhe ngritja e task forcës është një qasje e re dhe e vendosur e qeverisë për një luftë frontale ndaj strukturave të krimit.

“Është një rrugë e re për institucionet ligjzbatuese. I hapim luftë shumëfrotnale strukturave të krimit. Qeveria ka gjithë vullnetin dhe mekanizmat për këtë luftë. Krijimi i task forcës speciale është një tregues kuptimplotë i marrjes së përgjegjësisë ligjore dhe politike nga kjo qeveri”, deklaroi Xhafaj.

Ministri tha se megjithë progresin e bërë, jemi larg standardit të një shoqërie ku sundon ligji dhe drejtësia./topchannel